ഫോർട്ട്കൊച്ചി: കൊച്ചിയിലെ പ്രമുഖ വ്യവസായിയും ഹോളിവുഡ് നടനും തിരക്കഥാകൃത്തും സംവിധായകനുമായിരുന്ന തോമസ് ബെർളി (93) അന്തരിച്ചു.
ദീർഘകാലമായി മത്സ്യസംസ്കരണ-കയറ്റുമതി മേഖലയില്‍ പ്രവർത്തിച്ചുവരുകയായിരുന്നു. ഫോർട്ട്കൊച്ചിയിലെ കുരിശിങ്കല്‍ കുടുംബാംഗമാണ്. മുൻ കൗണ്‍സിലർമാരായിരുന്ന കെ.ജെ. ബെർളിയുടെയും ആനി ബെർളിയുടെയും മകനാണ്. 1954-ല്‍ അമേരിക്കയിലെ കാലിഫോർണിയ യൂണിവേഴ്സിറ്റിയില്‍നിന്ന് സിനിമാപഠനം പൂർത്തിയാക്കിയ അദ്ദേഹം അക്കാലത്ത് ഹോളിവുഡ് ചിത്രങ്ങളില്‍ അഭിനയിച്ചു. ഇംഗ്ലീഷ് ചിത്രങ്ങള്‍ക്ക് തിരക്കഥയുമെഴുതി. 1953-ല്‍ മലയാളത്തില്‍ വിമല്‍കുമാർ സംവിധാനം ചെയ്ത 'തിരമാല' എന്ന ചിത്രത്തില്‍ നായകനായി. ഇത് മനുഷ്യനോ, വെള്ളരിക്കാപട്ടണം എന്നീ ചിത്രങ്ങള്‍ സംവിധാനം ചെയ്തു. വെള്ളരിക്കാപട്ടണത്തിന്റെ സംഗീത സംവിധാനവും അദ്ദേഹം നിർവഹിച്ചിരുന്നു. ഭാര്യ: സോഫി തോമസ്. മക്കള്‍: ടാനിയ എബ്രഹാം, തരുണ്‍ കുരിശിങ്കല്‍, ടാമിയ ജോർജ്. മരുമക്കള്‍: എബ്രഹാം തോമസ്, ജോർജ് ജേക്കബ്. സംസ്കാരം പിന്നീട്.
Prominent businessman, Hollywood actor, screenwriter and director Thomas Burley passed away.
