.png)
കളമശേരി : (piravomnews.in) കളമശേരി മണ്ഡലത്തിലെ വിവിധ പ്രദേശങ്ങളെ ബന്ധിപ്പിച്ച് ആറ് പുതിയ കെഎസ്ആർടിസി സർവീസ് തുടങ്ങുമെന്ന് വ്യവസായമന്ത്രി പി രാജീവ്.
മന്ത്രി സംഘടിപ്പിച്ച പബ്ലിക് സ്ക്വയർ -പരാതിപരിഹാര അദാലത്തിൽ ഉയർന്ന നിർദേശങ്ങളും ആവശ്യങ്ങളും പരിഗണിച്ചാണ് പുതിയ സർവീസുകൾ ആരംഭിക്കുന്നത്. ആലുവ–പറവൂർ റൂട്ടിൽ ലിമിറ്റഡ് സ്റ്റോപ്പ് ഓർഡിനറി ബസുകളാണ് പുതുതായി തുടങ്ങുന്നത്.
അതോടൊപ്പം പുതിയ സർവീസ് ആരംഭിക്കുന്ന നടപടികളിലേക്ക് കടക്കാൻ തീരുമാനിച്ചതായി മന്ത്രി പറഞ്ഞു. പറവൂർ–കരിങ്ങാംതുരുത്ത് –തത്തപ്പിള്ളി–കൊങ്ങോർപ്പിള്ളി സർക്കുലർ, കൈന്റിക്കര–മുപ്പത്തടംവഴി കളമശേരി, വയൽക്കര–അടുവാശേരി–കുന്നുകര–അത്താണി എന്നീ സ്ഥലങ്ങളെ ബന്ധപ്പെടുത്തി തൃശൂരിലേക്ക് ദീർഘദൂര സർവീസ് തുടങ്ങുന്ന കാര്യവും പരിഗണിക്കും.
അധ്യയനവർഷാരംഭത്തിൽ വിദ്യാഭ്യാസ സ്ഥാപനങ്ങൾ തുറക്കുന്ന സാഹചര്യത്തിൽ പുതിയ സർവീസുകൾ എല്ലാവർക്കും പ്രയോജനകരമാകുമെന്ന് മന്ത്രി പിരാജീവ് പറഞ്ഞു. ഗതാഗതമന്ത്രി കെ ബി ഗണേഷ് കുമാറുമായി നേരത്തേ നടത്തിയ ചർച്ചയുടെ തുടർച്ചയായി കളമശേരിയിൽ നടത്തിയ യോഗത്തിലാണ് തീരുമാനമായത്.
കെഎസ്ആർടിസി പ്രതിനിധികളായ ആന്റണി ജോസഫ്, എടിഒ പി എൻ സുനിൽകുമാർ എന്നിവർ പങ്കെടുത്തു. മണ്ഡലത്തിലെ എല്ലാ പ്രദേശങ്ങളിലേക്കും ഗതാഗതസൗകര്യം ഉറപ്പുവരുത്തുന്നതിനായി നേരത്തേ വിവിധ ഘട്ടങ്ങളിലായി പുതിയ സർവീസുകളും ഗ്രാമവണ്ടിയും ആരംഭിച്ചിരുന്നു.
Public Square Adalat; 6 new KSRTC services in Kalamassery constituency
