കൊച്ചി : (piravomnews.in) ആദ്യ ഹൃദയം മാറ്റിവയ്‌ക്കൽ ശസ്‌ത്രക്രിയക്കായി ഒരുങ്ങുന്ന എറണാകുളം ജനറൽ ആശുപത്രിയിൽ എക്മോ മെഷീൻ എത്തി. ഹൃദയത്തിന്റെയും ശ്വാസകോശത്തിന്റെയും പ്രവർത്തനങ്ങൾ താൽക്കാലികമായി ഏറ്റെടുത്ത്‌ ഒരാളുടെ ജീവന് പിന്തുണയേകുന്ന സംവിധാനമാണിത്‌.
ഗുരുതരമായതും ജീവൻ അപകടപ്പെടുത്തുന്നതുമായ അവസ്ഥകളുള്ള രോഗികളെ സഹായിക്കുന്നതിന് ഈ യന്ത്രം ഉപയോഗിക്കുന്നു. കടുത്ത ഹൃദയപരാജയം സംഭവിച്ചവരിൽ ഓക്സിജൻ അടങ്ങിയ രക്തം ശരീരത്തിലേക്ക് പമ്പുചെയ്ത്‌ എക്മോ ഹൃദയത്തെ പിന്തുണയ്ക്കുന്നു.
60.5 ലക്ഷം രൂപയാണ്‌ ഈ സംവിധാനത്തിന്റെ വില. യന്ത്രം ശനിയാഴ്‌ച കാത്ത്‌ ലാബിൽ ക്രമീകരിക്കുമെന്ന്‌ ആശുപത്രി സൂപ്രണ്ട്‌ ഡോ. ആർ ഷാഹിർഷാ പറഞ്ഞു. ഇൻട്രാ അയോട്ടിക്‌ ബലൂൺ പമ്പ്‌ (ഐഎബിപി) ഉടൻ എത്തുമെന്നും അദ്ദേഹം പറഞ്ഞു.
45 ലക്ഷം രൂപ ചെലവ്‌ വരുന്ന ഈ യന്ത്രം ഉപയോഗിച്ച്‌ ശരീരത്തിലേക്ക് കൂടുതൽ രക്തം പമ്പുചെയ്യാനാകും. ഹൃദയത്തിന്റെ വിശ്രമഘട്ടത്തിലും ഹൃദയത്തിലേക്കും മറ്റ് അവയവങ്ങളിലേക്കും രക്തയോട്ടം മെച്ചപ്പെടുത്തുന്നതും ഈ യന്ത്രത്തിന്റെ സഹായത്താലാണ്‌.
പരിശീലനം പൂർത്തിയാക്കിയ വിദഗ്‌ധ ഡോക്‌ടർമാരും നഴ്‌സുമാരും സേവനസന്നദ്ധരായുണ്ട്‌. രാജ്യത്ത് ആദ്യമായി ഒരു ജില്ലാ ആശുപത്രിയിൽ ഹൃദയം മാറ്റിവയ്‌ക്കൽ ശസ്ത്രക്രിയ നടത്താനുള്ള അനുമതി എറണാകുളം ഗവ. ജനറൽ ആശുപത്രിക്ക്‌ ലഭിച്ചത്‌ ഡിസംബർ ഒന്നിനാണ്‌.
#General #Hospital #prepares for #first #heart #transplant #surgery
