.png)
കൊച്ചി : (piravomnews.in) കൊച്ചി നഗരത്തിലെ ജനകീയ ഭക്ഷണശാല "സമൃദ്ധി @കൊച്ചി'യുടെ പ്രഥമ കാന്റീൻ യൂണിറ്റ് ജിസിഡിഎയിൽ തിങ്കളാഴ്‌ച ആരംഭിക്കും.
കൊച്ചി കോർപറേഷനും കുടുംബശ്രീ ജില്ലാ മിഷനും ചേർന്ന്‌ ആരംഭിച്ച "സമൃദ്ധി @കൊച്ചി'വിജയകരമായ നാലാംവർഷത്തിലേക്ക്‌ കടക്കുമ്പോഴാണ്‌ കാന്റീൻ ഏറ്റെടുത്ത്‌ പുതിയ ചുവടുവയ്‌പ്‌. ജിസിഡിഎയുടെ കടവന്ത്രയിലെ ആസ്ഥാനമന്ദിരത്തിൽ രാവിലെ 10ന്‌ മേയർ എം അനിൽകുമാർ ഉദ്ഘാടനം ചെയ്യും.
ജിസിഡിഎ ചെയർമാൻ കെ ചന്ദ്രൻപിള്ള അധ്യക്ഷനാകും.ജിസിഡിഎ ആസ്ഥാനത്ത്‌ സമൃദ്ധി കാന്റീൻ തുറക്കുന്നതോടെ ഇവിടെയെത്തുന്ന പൊതുജനങ്ങൾക്കും ജീവനക്കാർ, സമീപത്തുള്ള മറ്റ് ഓഫീസ് ജീവനക്കാർ, തൊഴിലാളികൾ എന്നിവർക്കെല്ലാം ആശ്വാസമാകും. പ്രഭാതഭക്ഷണം, ഊണ്, ലഘുഭക്ഷണങ്ങൾ, ചായ, കാപ്പി എന്നിവയെല്ലാം ന്യായമായ വിലയിൽ ലഭ്യമാകും.
കാന്റീനായതിനാൽ പൊതുജനങ്ങൾക്ക്‌ ഊണിന്‌ 40 രൂപയാകും വില. മറ്റ് വിഭവങ്ങൾ "സമൃദ്ധി@കൊച്ചി'യിലെ വിലയിൽത്തന്നെ ലഭിക്കും. രാവിലെ ഏഴുമുതൽ രാത്രി 10 വരെ പ്രവർത്തിക്കും.
കുറഞ്ഞ വിലയിൽ ഗുണമേന്മയുള്ളതും രുചികരവുമായ ഭക്ഷണം നൽകുക എന്നതിനൊപ്പം കുടുംബശ്രീ പ്രവർത്തകർക്ക്‌ ഉപജീവനമാർഗംകൂടിയാണ്‌ സമൃദ്ധി നൽകുന്നത്‌. കാന്റീൻനടത്തിപ്പും കുടുംബശ്രീ പ്രവർത്തകർക്കാണ്‌. ഇരുപതോളം പേർക്ക് തൊഴിൽ ലഭിക്കും.
Samrudhi@Kochi's first canteen at GCDA
