കൊച്ചി : (piravomnews.in) സൂപ്പർഹിറ്റ് കുറ്റാന്വേഷണ സിനിമയുടെ എല്ലാചേരുവകളുമുണ്ടായിരുന്നു കേരള പൊലീസിന്റെ ഓപ്പറേഷൻ റോബിൻഹുഡിന്.
ചലച്ചിത്രസംവിധായകൻ ജോഷിയുടെ പനമ്പിള്ളി നഗറിലെ വീട്ടിൽനിന്ന് വജ്രാഭരണങ്ങളടക്കം ഒരുകോടി രൂപ വിലമതിക്കുന്ന ആഭരണങ്ങൾ കവർന്ന കേസിലെ പ്രതി ബിഹാർ സ്വദേശി ഇർഫാൻ എന്ന ബിഹാർ റോബിൻഹുഡിനെ 15 മണിക്കൂറിനുള്ളിൽ പിടികൂടി പൊലീസ് സൃഷ്ടിച്ചത് ബ്ലോക്ക്ബസ്റ്റർ.
കേരള പൊലീസിന്റെ അന്വേഷണ മികവിൽ അടിതെറ്റിവീണ കുപ്രസിദ്ധ മോഷ്ടാവായ മുഹമ്മദ് ഇർഫാനെന്ന ബിഹാർ റോബിൻഹുഡ് വിവിധ സംസ്ഥാനങ്ങളിൽ നിരവധി കവർച്ച കേസുകളിൽ പ്രതിയാണ്. ശനി പുലർച്ചെ 2.30നായിരുന്നു ജോഷിയുടെ വീട്ടിൽ മോഷണം.
വൈകിട്ട് അഞ്ചിന്, 15 മണിക്കൂറിനകം ഇർഫാൻ കസ്റ്റഡിയിലായി. മോഷണവിവരം അറിഞ്ഞയുടൻ പൊലീസ് സ്ഥലത്തെത്തി. സിറ്റി പൊലീസ് കമീഷണർ എസ് ശ്യാംസുന്ദർ പ്രത്യേക അന്വേഷകസംഘത്തിന് രൂപംനൽകി.
എസിപി രാജ്കുമാറിനായിരുന്നു മേൽനോട്ടം. സൗത്ത് എസ്എച്ച്ഒ പ്രേംകൃഷ്ണൻ ഉൾപ്പെടെയുള്ളവരായിരുന്നു ടീമിൽ. ആദ്യം കിട്ടിയത് മോഷ്ടാവിന്റെ സിസിടിവി ദൃശ്യം. തുടരന്വേണത്തിൽ മഹാരാഷ്ട്ര രജിസ്ട്രേഷനിലുള്ള ഹോണ്ട അക്കോർഡ് കാറിന്റെ ദൃശ്യവും കിട്ടി.
ജോഷിയുടെ വീടിന്റെ പരിസരത്തുനിന്ന് കാർ പോകുന്നതായിരുന്നു ദൃശ്യങ്ങളിൽ. മഹാരാഷ്ട്ര രജിസ്ട്രേഷൻകൂടിയായതോടെ പൊലീസിന്റെ സംശയം ബലപ്പെട്ടു. ദൃശ്യങ്ങളും മോഷണവിവരങ്ങളും മഹാരാഷ്ട്ര, കർണാടകം, ഗോവ സംസ്ഥാനങ്ങൾക്ക് കൈമാറി.
കാർ കർണാടകത്തിലേക്ക് കടന്നതായി വിവരം ലഭിച്ചു. തലപ്പാടിയിൽനിന്നായിരുന്നു വിവരം. കാർ കടന്നുപോയ സമയം പകൽ 2.30. മുംബൈയിലേക്ക് കടക്കാനാണ് പ്രതിയുടെ ലക്ഷ്യമെന്ന് പൊലീസ് തിരിച്ചറിഞ്ഞു.
കമീഷണർ കാർവാർ, ഉഡുപ്പി, മംഗളൂരു പൊലീസ് ഉദ്യോഗസ്ഥരെ ബന്ധപ്പെട്ടു. ഉഡുപ്പി സംസ്ഥാൻ പ്ലാസയിൽ പൊലീസിനെ വെട്ടിച്ച് പ്രതി കടന്നു. പിന്നാലെ പൊലീസ്. ദേശീയപാതയിൽ കോട്ടയിൽവച്ച് പൊലീസ് വാഹനം ഇർഫാന്റെ കാറിന് കുറുകെയിട്ട് നാലുവശത്തുനിന്ന് വളഞ്ഞശേഷം ഇർഫാനെ കസ്റ്റഡിയിലെടുത്തു.
ഡൽഹി, പഞ്ചാബ്, ആന്ധ്ര, മഹാരാഷ്ട്ര, ഗോവ ഉൾപ്പെടെയുള്ള സ്ഥലങ്ങളിലെ മോഷണക്കേസുകളിൽ പ്രതിയാണ് ഇർഫാൻ. മോഷണമുതലിന്റെ ഒരുഭാഗം ആഡംബരജീവിതത്തിന് ഉപയോഗിക്കുകയും ശേഷിക്കുന്നത് നിർധനർക്ക് ദാനം ചെയ്യുകയുമാണ് രീതി.
ഹരിയാനയിലെ ജയിലിൽനിന്ന് അടുത്തിടെയാണ് ഇയാൾ പുറത്തിറങ്ങിയത്.റോബിൻ ഹുഡെന്ന പേരിൽ പൃഥ്വിരാജിനെ നായകനാക്കി ജോഷി സിനിമ സംവിധാനം ചെയ്തിട്ടുണ്ട്. റോബിൻഹുഡ് എന്നപേരിൽ കുപ്രസിദ്ധിയുള്ളയാൾ തന്നെയാണിപ്പോൾ പിടിയിലായതും.
#Operation #Robinhood; This is a #police #blockbuster