കവിത;എൻ്റെ വിദ്യാലയത്തിലേക്കൊരു യാത്ര

• കവിത...  എൻ്റെ വിദ്യാലയത്തിലേക്കൊരു യാത്ര
• ഒറ്റക്കെനിക്കൊന്ന് പോകണം,
• എൻ്റെയാ വിദ്യാലയത്തിൽ...
• നന്മയുടെ ബാല്യത്തെ ഓർമ്മ-
• പ്പെടുത്താനൊരു യാത്ര...
• കാലങ്ങൾ മുന്നേ പടിയിറങ്ങി -
• പ്പോയ ബാല്യം...
• നിറമുള്ള മണമുള്ള സ്നേഹത്തിൻ
• രുചിയുള്ള ബാല്യം.
• ക്ലാസ്സ് മുറിയുടെ വരാന്തയിലെനി -
• ക്കൊന്നിരിക്കണം,
• ഓർക്കാത്ത ചില മുഖങ്ങളെ
• ഓർത്തെടുക്കാൻ,
• ഗുരുക്കളെ മനസ്സാൽ കാൽതൊട്ട്
• വണങ്ങണം,
• മേശമേൽ തല ചായ്ച്ച് ഏറെ
• നേരമെൻ മിഴി പൂട്ടണം.
• മുറ്റത്തെ ചെമ്പകച്ചോട്ടിലിരുന്ന്,
• പണ്ടത്തെ കാഴ്ചകൾ ഓരോന്നായി
• കാണണ,മന്നെനിക്ക്..
• അവിടം നിറയെ കല്ലുകൾ
• ഉണ്ടായിരിക്കും,
• ബദാമിൻ്റെ കറകൾ വീണ്
• നിറം മാറിയ കല്ലുകൾ.
• വിധികർത്താക്കളും കരഘോഷ -
• ങ്ങളുമില്ലാത്ത,
• ആ വേദിയിൽ ഒരു നിമിഷമെങ്കിലും
• നിൽക്കണം.
• മണിയൊച്ച കേൾക്കുന്ന നേരവും കാത്തന്ന്,
• അലസമായ് ഏറെ ഇരുന്നിരിക്കാം!
• മഴ നനഞ്ഞൊട്ടിയ പുസ്തക -
• ത്താളുകൾ ഓർമ്മ തൻ ചെപ്പിൽ വച്ചൊന്നുണക്കാം.
• അമ്പഴവും മാങ്ങയും
• ലോലോലിക്കയും
• നാവിൽ നുണഞ്ഞൊ,ന്നിറക്കാം..
• കുളം കരയും,
• കക്കും കളിച്ചാ
• വരകൾ ഇന്നുമവിടുണ്ടോ?
• എന്ന്, ആ മൈതാനിയിലൊന്ന് പരതണം.
• മനസ്സിലാ വരകളിന്നും മായാതെ
• മറയാതെ നിറയുന്നു.
• ഒളിച്ചു കളിച്ചെണ്ണിയ
• ഭിത്തികളിലിന്നു,മാ
• അക്കങ്ങൾ,ചിലപ്പോൾ മുഴങ്ങി
• കേൾക്കാം.
• ഒരുമയുടെ രുചിയുള്ള ഉച്ചക്കഞ്ഞി -
• പ്പുരയൊന്നു കാണണം
• സൗഹൃദം കോറിയിട്ട ഉണങ്ങിയ
• മുറിപ്പാടുകളിലൂടെ…
• എനിക്കൊന്നു പോകണം...
• എൻ്റെയാ വിദ്യാലയത്തിൽ..
• . 
• സുജ വൈഷ്ണവം

poem ente vidhyalayathilekkoru yathra