കൊച്ചി : (piravomnews.in) ചിത്രകാരനും ശിൽപ്പിയും കലാചിന്തകനുമായിരുന്ന എം വി ദേവന്റെ സ്മരണകൾ ഉണർത്തി ‘ദേവയാനം’ ചിത്രപ്രദർശനത്തിന് തുടക്കം.
മുപ്പത്തിനാല് കലാകാരൻമാരുടെ സൃഷ്ടികൾ ഉൾപ്പെടുത്തിയ ചിത്ര–-ശിൽപ്പ പ്രദർശനത്തിന് മഹാകവി ജി സ്മാരക സാംസ്കാരിക കേന്ദ്രത്തിലാണ് തുടക്കമായത്.
ടി കലാധരൻ, അക്കിത്തം നാരായണൻ, പി ഗോപിനാഥ്, കെ കെ ശശി, ജി രാജേന്ദ്രൻ, ബിനുരാജ് കലാപീഠം തുടങ്ങിയ കലാകാരൻമാരുടെ ചിത്രങ്ങളാണ് എം വി ദേവന് ആദരമർപ്പിച്ച് ഒരുക്കിയിട്ടുള്ളത്. ബാലൻ നമ്പ്യാർ ഒരുക്കിയ, തെയ്യത്തിന്റെ മുടിയെ സൂചിപ്പിക്കുന്ന ശിൽപ്പവും ഗ്യാലറിയിൽ കാണാം.
മെയ് ഏഴിന് പ്രദർശനം സമാപിക്കും. ചിത്രപ്രദർശനം മേയർ എം അനിൽകുമാർ ഉദ്ഘാടനം ചെയ്തു. ഏഷ്യൻ ആർട്സ് സെന്ററും പൗർണമി ആർട്ട് ഗ്യാലറിയും ചേർന്ന് ഏർപ്പെടുത്തിയ മൂന്നാമത് എം വി ദേവൻ പുരസ്കാരം കലാനിരൂപകനും ചിത്രകാരനും കവിയുമായ എം രാമചന്ദ്രന് മേയർ സമ്മാനിച്ചു.
കൊച്ചി കോർപറേഷന്റെ കീഴിലുള്ള ആർട്ട്സ് സ്പേസ് കൊച്ചിയുടെയും ലളിതകലാ അക്കാദമിയുടെയും സഹകരണത്തോടെയാണ് പരിപാടി സംഘടിപ്പിച്ചത്. ഡോ. മഹേഷ് മംഗലാട്ട് അധ്യക്ഷനായി. കേരള ലളിതകലാ അക്കാദമി ചെയർമാൻ മുരളി ചീരോത്ത് മുഖ്യാതിഥിയായി.
പ്രൊഫ. എം തോമസ് മാത്യു അനുസ്മരണ പ്രഭാഷണം നടത്തി. അവാർഡ് ജേതാവിനെ ബിനുരാജ് കലാപീഠം പരിചയപ്പെടുത്തി.
കേരള ലളിത കലാ അക്കാദമി സെക്രട്ടറി എൻ ബാലമുരളീകൃഷ്ണൻ, പ്രൊഫ. സി എസ് ജയറാം, ജെ സനിൽമോൻ, മിനി ദിലീപ്, ടി കലാധരൻ, രാജൻ ചേടമ്പത്ത്, സുരേഷ് കൂത്തുപറമ്പ്, എം രാമചന്ദ്രൻ എന്നിവർ സംസാരിച്ചു.
#'Devayanam' movie #exhibition started by #evoking the #memories of #MVDevan