തിരുവനന്തപുരം.... അഘോരി സന്യാസി പ്രമുഖൻ ശ്രീ ശ്രീ കൈലാസനാഥപുരി സ്വാമികൾ (മഹാകാൽ ബാബ) തിരുവനന്തപുരത്തെത്തി. വെങ്ങാനൂർ ചാവടിനട പൗർണമിക്കാവ് ബാലഭദ്ര ദേവി ക്ഷേത്രത്തിൽ നടക്കുന്ന മഹാകാളിയാഗത്തിൽ പങ്കെടുക്കാനായാണ് കൈലാസനാഥപുരി സ്വാമികൾ എത്തിയത്. കഴിഞ്ഞ ഒൻപത് ദിവസമായി തുടരുന്ന മഹാകാളിയാഗം ഇന്ന് മൂന്നാം ഘട്ടത്തിലേക്ക് കടക്കും.
വെള്ളിയാഴ്ച ഉച്ചയ്ക്ക് ഒരുമണിയോടെയാണ് അഘോരി സന്യാസികളുടെ കുലപതിയായ മഹാകാൽ ബാബ എന്നറിയപ്പെടുന്ന ശ്രീ ശ്രീ കൈലാസനാഥപുരി സ്വാമികൾ തലസ്ഥാനത്ത് എത്തിയത്. വേളി റെയിൽവേ സ്റ്റേഷനിൽ എത്തിയ അദ്ദേഹത്തെ ക്ഷേത്രഭാരവാഹികൾ ചേർന്ന് സ്വീകരിച്ചു. പത്മനാഭ സ്വാമി ക്ഷേത്രത്തിലടക്കം വിവിധ കേന്ദ്രങ്ങളിൽ സ്വീകരണം ഒരുക്കിയിരുന്നു. പ്രത്യേകം അലങ്കരിച്ച രഥത്തിലാണ് സ്വാമികളെ പൗർണമിക്കാവ് ക്ഷേത്രത്തിലെ യാഗശാലയിലേക്ക് എത്തിച്ചത്.
നിരവധി വാഹനങ്ങൾ രഥത്തിന് അകമ്പടി സേവിച്ചു. വൈകിട്ട് നടന്ന മഹാകാലഭൈരവ ഹവനത്തിൽ അദ്ദേഹം പങ്കെടുത്തു.ഹിമാലയത്തിൽ തപസ് അനുഷ്ഠിക്കുന്ന ശ്രീ ശ്രീ കൈലാസനാഥപുരി സ്വാമികൾക്ക് 87 വയസുണ്ട്. ഉത്തരാഖണ്ഡിലാണ് ആശ്രമം സ്ഥിതി ചെയ്യുന്നത്. ആദ്യമായാണ് ദക്ഷിണേന്ത്യയിൽ ഒരു പൊതുപരിപാടിയിൽ പങ്കെടുക്കാനായി സ്വാമികൾ എത്തുന്നത്. അതേസമയം നൂറോളം അഘോരി സന്യാസികളാണ് പൗർണമിക്കാവിലെ മഹാകാളിയാഗത്തിൽ പങ്കെടുക്കുന്നത്. കൊല്ലൂർ മൂകാംബിക ക്ഷേത്രത്തിലെ മുഖ്യപുരോഹിതൻ അടക്കമുള്ള പ്രമുഖ ആചാര്യന്മാരാണ് യാഗത്തിനു നേതൃത്വം നൽകുന്നത്. ഈ മാസം 16 നു യാഗം അവസാനിക്കും
Aghori Sanyasi Prominent Sri Sri Kailasanathapuri Swamis (Mahakal Baba) in Thiruvananthapuram;