---
title: "ആസിഡ് ടാങ്കർ ലോറി അപകടത്തിൽപ്പെട്ടു; മണിക്കൂറുകളോളം ഗതാഗതം തടസ്സപ്പെട്ടു"
english_title: "Acid tanker lorry accident Kakkanad seaport airport road traffic blocked"
publisher: "piravomnews.in"
canonical_url: "https://piravom.truevisionnews.com/news/385108/acid-tanker-lorry-accident-seaport-airport-road-traffic-block"
published_at: "2026-10-02T09:39:00+05:30"
category: "Ernakulam "
language: "ml"
image: "https://cf.zdn.im/img/truevisionnews.com/0/image-uploads/6abf3100c1843_1000769536.jpg"
keywords: ["tanker accident", "traffic block", "acid tanker lorry"]
---

# ആസിഡ് ടാങ്കർ ലോറി അപകടത്തിൽപ്പെട്ടു; മണിക്കൂറുകളോളം ഗതാഗതം തടസ്സപ്പെട്ടു

> **Lead Summary:** കാക്കനാട്: ആസിഡ് കയറ്റിവന്ന ടാങ്കർ ലോറി അപകടത്തിൽപ്പെട്ടതിനെ തുടർന്ന് സീപോർട്ട്-എയർപോർട്ട് റോഡിൽ മണിക്കൂറുകളോളം ഗതാഗതം തടസ്സപ്പെട്ടതായി റിപ്പോർട്ട്. വ്യാഴം പുലർച്ചെ മൂന്നോടെ കലക്ടറേറ്റ് സിഗ്നൽ ജങ്ഷനിലാണ് അപകടമുണ്ടായത് എന്നാണ് വിവരം.

## Article Content

കാക്കനാട്: ആസിഡ് കയറ്റിവന്ന ടാങ്കർ ലോറി അപകടത്തിൽപ്പെട്ടതിനെ തുടർന്ന് സീപോർട്ട്-എയർപോർട്ട് റോഡിൽ മണിക്കൂറുകളോളം ഗതാഗതം തടസ്സപ്പെട്ടതായി റിപ്പോർട്ട്. വ്യാഴം പുലർച്ചെ മൂന്നോടെ കലക്ടറേറ്റ് സിഗ്നൽ ജങ്ഷനിലാണ് അപകടമുണ്ടായത് എന്നാണ് വിവരം.

ചെന്നൈയിൽ നിന്ന് ഇരുമ്പനത്തേക്ക് പോകുകയായിരുന്ന ടാങ്കർ ലോറിയാണ് അപകടത്തിൽപ്പെട്ടത്. മുന്നിൽ പോയിരുന്ന ലോറി പെട്ടെന്ന് ബ്രേക്ക് ചെയ്തതോടെ ടാങ്കർ പിന്നിൽ ഇടിക്കുകയായിരുന്നു എന്നാണ് പ്രാഥമിക വിവരം. ഇടിയുടെ ആഘാതത്തിൽ ടാങ്കറിന്റെ മുൻഭാഗം തകരുകയും ലോറി ജങ്ഷന്റെ മധ്യത്തിലായി നിൽക്കുകയും ചെയ്തു. അപകടത്തിൽ ആർക്കും പരിക്കില്ലെന്ന് പൊലീസ് പറയുന്നു.

പുലർച്ചെ ആയതിനാൽ ആദ്യം വലിയ തിരക്ക് ഉണ്ടായിരുന്നില്ലെങ്കിലും രാവിലെയായതോടെ റോഡിൽ വാഹനങ്ങളുടെ നീണ്ട നിര രൂപപ്പെട്ടു. രാവിലെ എട്ട് മണിയോടെ ലോറി സ്ഥലത്ത് നിന്ന് മാറ്റാൻ ശ്രമിച്ചെങ്കിലും 300 മീറ്റർ മാത്രം മുന്നോട്ട് പോയ ശേഷം ടിവി സെന്റർ ജങ്ഷന് സമീപത്ത് വെച്ച് വീണ്ടും തകരാറിലായതായി ദൃക്സാക്ഷികൾ പറയുന്നു. ഇതോടെ വള്ളത്തോൾ ജങ്ഷൻ വരെയും ചിത്രപ്പുഴ പാലം വരെയും കിലോമീറ്ററുകളോളം വാഹനങ്ങൾ കുടുങ്ങി.

പിന്നീട് കെഎംആർഎല്ലിന്റെ കൂറ്റൻ വാഹനം എത്തിച്ച് വടം കെട്ടി ടാങ്കർ വലിച്ചു നീക്കാൻ ശ്രമിച്ചെങ്കിലും പ്രത്യേക സാമ്പത്തിക മേഖല ഓഫീസിന് മുന്നിൽ വെച്ച് വടം പൊട്ടി ലോറി വീണ്ടും റോഡരികിൽ മണിക്കൂറുകളോളം കിടന്നതോടെ ഗതാഗത തടസ്സം രൂക്ഷമായി. ഏറെ നേരത്തെ പരിശ്രമത്തിനൊടുവിലാണ് ലോറി നീക്കം ചെയ്ത് ഗതാഗതം പുനഃസ്ഥാപിച്ചത്.

അതേസമയം സീപോർട്ട്-എയർപോർട്ട് റോഡിൽ രാത്രികാലങ്ങളിൽ പൊലീസ് പട്രോളിംഗും മോട്ടോർ വാഹന വകുപ്പിന്റെ പരിശോധനയും കാര്യക്ഷമമല്ലെന്ന പരാതി നാട്ടുകാർ ഉന്നയിക്കുന്നുണ്ടെന്നാണ് റിപ്പോർട്ട്. അപകടകരമായ രാസവസ്തുക്കളും പെട്രോളിയം ഉൽപ്പന്നങ്ങളും കയറ്റിയ ഇതര സംസ്ഥാന ടാങ്കർ ലോറികൾ രാത്രിയിൽ സുരക്ഷാ മാനദണ്ഡങ്ങൾ പാലിക്കാതെയാണ് സഞ്ചരിക്കുന്നതെന്നാണ് നാട്ടുകാരുടെ ആരോപണം.

**

English Summary: **

An acid-laden tanker lorry from Chennai to Irumpanam met with an accident at Collectorate Signal Junction on Seaport-Airport Road in Kakkanad around 3 am on Thursday after hitting a lorry that braked suddenly. The tanker's front portion was damaged and it got stuck in the middle of the junction. Though traffic was initially low, long queues formed from morning. Attempts to tow it failed twice, blocking traffic up to Vallathol Junction and Chithrapuzha bridge for hours. No injuries reported.

### Related Links & Sources
- [Original Story Source](https://piravom.truevisionnews.com/news/385108/acid-tanker-lorry-accident-seaport-airport-road-traffic-block)