---
title: " വീട്ടിനകത്ത് കട്ടിലിൽ കാട്ടുപന്നി കയറി ; രണ്ടരവയസ്സുകാരി രക്ഷപ്പെട്ടത് അമ്മാവന്റെ ഇടപെടലിൽ"
english_title: "Wild Boar Attacks House in Manjeri Malappuram, Toddler Rescued by Uncle"
publisher: "piravomnews.in"
canonical_url: "https://piravom.truevisionnews.com/news/377325/malappuram-manjeri-wild-boar-attack-house-toddler-rescued"
published_at: "2026-08-07T19:12:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a75e5787f68b_1000707156.jpg"
keywords: []
---

#  വീട്ടിനകത്ത് കട്ടിലിൽ കാട്ടുപന്നി കയറി ; രണ്ടരവയസ്സുകാരി രക്ഷപ്പെട്ടത് അമ്മാവന്റെ ഇടപെടലിൽ

> **Lead Summary:** മലപ്പുറം: മഞ്ചേരിയിലെ ഒരു വീടിനകത്തേക്ക് കാട്ടുപന്നി കയറി പരിഭ്രാന്തി സൃഷ്ടിച്ചു. വീടിനകത്ത് കളിച്ചുകൊണ്ടിരുന്ന രണ്ടരവയസ്സുകാരി അമ്മാവന്റെ സമയോചിതമായ ഇടപെടലിനെ തുടർന്ന് അത്ഭുതകരമായി രക്ഷപ്പെട്ടു.

## Article Content

മലപ്പുറം: മഞ്ചേരിയിലെ ഒരു വീടിനകത്തേക്ക് കാട്ടുപന്നി കയറി പരിഭ്രാന്തി സൃഷ്ടിച്ചു. വീടിനകത്ത് കളിച്ചുകൊണ്ടിരുന്ന രണ്ടരവയസ്സുകാരി അമ്മാവന്റെ സമയോചിതമായ ഇടപെടലിനെ തുടർന്ന് അത്ഭുതകരമായി രക്ഷപ്പെട്ടു.

മഞ്ചേരി സ്വദേശി അലവിയുടെ വീട്ടിലാണ് സംഭവം. വീടിന്റെ മുൻവാതിൽ തുറന്നുകിടന്ന സമയം നോക്കി കാട്ടുപന്നി അകത്തേക്ക് കടക്കുകയായിരുന്നു. ആദ്യം അടുക്കളയിലേക്ക് ഓടിയ പന്നി, അവിടെ ആളുകളെ കണ്ടതോടെ പരിഭ്രാന്തരായി അലവിയുടെ മകൻ ഫവാസിന്റെ മകൾ കളിച്ചുകൊണ്ടിരുന്ന മുറിയിലേക്ക് ഓടിക്കയറി.

വാതിലിനോട് ചേർന്ന് കുട്ടി നിൽക്കുന്നത് കണ്ട ഫവാസിന്റെ അമ്മാവൻ അബ്ദുൾ ഹക്കീം ഉടൻതന്നെ ഇടപെട്ടു. കുഞ്ഞിനെ വേഗത്തിൽ വാരിയെടുത്ത് പുറത്തെത്തിച്ച് വാതിൽ പുറത്തുനിന്ന് പൂട്ടിയതാണ് വൻ ദുരന്തം ഒഴിവാക്കിയത്.

വിവരമറിഞ്ഞ് വാർഡ് കൗൺസിലർ പി. ഷംസിയ സ്ഥലത്തെത്തി. തുടർന്ന് നഗരസഭയുടെ അനുമതിയോടെ എംപാനൽഡ് ഷൂട്ടർമാരായ കെ.വി. ഇല്യാസ് ബാബുവും സഹോദരൻ നൗഷാദും സ്ഥലത്തെത്തി. ജനൽപ്പാളി തുറന്ന് മുറിക്കുള്ളിൽ കുടുങ്ങിക്കിടന്ന കാട്ടുപന്നിയെ അവർ വെടിവെച്ചുകൊന്നു.

നാട്ടുകാരുടെ സഹായത്തോടെ പന്നിയുടെ ജഡം പുറത്തെടുത്ത് ആരോഗ്യവകുപ്പിന്റെ മാനദണ്ഡങ്ങൾ പാലിച്ച് സംസ്കരിച്ചു. മലപ്പുറം ജില്ലയുടെ വിവിധ ഭാഗങ്ങളിൽ കാട്ടുപന്നിയുടെ ശല്യം രൂക്ഷമായ സാഹചര്യത്തിലാണ് ഈ സംഭവം.

Manjeri, Malappuram, Wild Boar Attack, Kerala News, Animal Attack, Toddler Rescue

### Related Links & Sources
- [Original Story Source](https://piravom.truevisionnews.com/news/377325/malappuram-manjeri-wild-boar-attack-house-toddler-rescued)