---
title: "എറണാകുളത്ത് വഞ്ചി മറിഞ്ഞ് രണ്ട് മത്സ്യത്തൊഴിലാളികൾക്ക് ദാരുണാന്ത്യം"
english_title: "Two fishermen die after boat capsizes in Ernakulam."
publisher: "piravomnews.in"
canonical_url: "https://piravom.truevisionnews.com/news/371862/two-fishermen-die-after-boat-capsizes-in-ernakulam"
published_at: "2026-07-11T15:37:00+05:30"
category: "Ernakulam "
language: "ml"
image: "https://cf.zdn.im/img/truevisionnews.com/0/image-uploads/6a5215f896379_1000674374.jpg"
keywords: []
---

# എറണാകുളത്ത് വഞ്ചി മറിഞ്ഞ് രണ്ട് മത്സ്യത്തൊഴിലാളികൾക്ക് ദാരുണാന്ത്യം

> **Lead Summary:** പുതുവൈപ്പ് തീരത്ത് വഞ്ചി മറിഞ്ഞ് രണ്ട് മത്സ്യത്തൊഴിലാളികൾ മരിച്ചു. പുതുവൈപ്പ് സ്വദേശികളായ സാബു, ദേവസി എന്നിവരാണ് മരിച്ചത്. ഇരുവരുടെയും മൃതദേഹങ്ങൾ കണ്ടെടുത്തു. ഇതിനിടയിൽ, തീരദേശ മേഖലയിൽ കടൽക്ഷോഭം രൂക്ഷമായി തുടരുകയാണ്.

## Article Content

പുതുവൈപ്പ് തീരത്ത് വഞ്ചി മറിഞ്ഞ് രണ്ട് മത്സ്യത്തൊഴിലാളികൾ മരിച്ചു. പുതുവൈപ്പ് സ്വദേശികളായ സാബു, ദേവസി എന്നിവരാണ് മരിച്ചത്. ഇരുവരുടെയും മൃതദേഹങ്ങൾ കണ്ടെടുത്തു. ഇതിനിടയിൽ, തീരദേശ മേഖലയിൽ കടൽക്ഷോഭം രൂക്ഷമായി തുടരുകയാണ്.

പള്ളിപ്പുറം കോൺവൻ്റ് ബീച്ചിലും പരിസരങ്ങളിലും കടൽ കയറ്റം അതിശക്തമാണ്. കടൽഭിത്തിയെപ്പോലും മറികടന്ന് തിരമാലകൾ റോഡിലേക്കും വീടുകളിലേക്കും ഇരച്ചുകയറുകയാണ്. മേഖലയിലെ പതിനഞ്ചോളം വീടുകളിൽ സ്ഥിരമായി വെള്ളം കയറുന്ന അവസ്ഥയാണെന്നും കുടുംബങ്ങൾ വലിയ ഭീതിയിലാണെന്നും നാട്ടുകാർ പറയുന്നു.

കൂടാതെ, തിരമാലകൾക്കൊപ്പം കനത്ത മാലിന്യങ്ങളും മണലും കരയിലെത്തുന്നത് ആരോഗ്യപ്രശ്‌നങ്ങളും ഗതാഗത തടസ്സവും സൃഷ്ടിക്കുന്നുണ്ട്. പണ്ട് വലിയ കടൽക്ഷോഭങ്ങൾ ബാധിക്കാത്ത നായരമ്പലം വെളിയത്താംപറമ്പ് പോലുള്ള പ്രദേശങ്ങളിലും ഇപ്പോൾ സ്ഥിതി ഗുരുതരമാണ്. ഓരോ വർഷവും കടൽ കയറ്റത്തിൻ്റെ രീതിയിലും തീവ്രതയിലും പ്രവചനാതീതമായ മാറ്റങ്ങളാണ് കാണുന്നതെന്ന് നാട്ടുകാർ ചൂണ്ടിക്കാട്ടുന്നു.

ചെറായിയിലും സമീപ പ്രദേശങ്ങളിലും ദിവസങ്ങളായി കടൽക്ഷോഭം ശക്തമാണ്. പലയിടത്തും ജിയോ ബാഗുകൾ ഉപയോഗിച്ചുള്ള താൽക്കാലിക സുരക്ഷാ സംവിധാനങ്ങളാണ് കർഷകർക്കും നാട്ടുകാർക്കും ഒരേയൊരു ആശ്വാസം. കടൽ കൂടുതൽ പ്രക്ഷുബ്ധമായാൽ സ്ഥിതി നിയന്ത്രണാതീതമാകുമോ എന്ന ആശങ്കയിലാണ് തീരദേശവാസികൾ.

### Related Links & Sources
- [Original Story Source](https://piravom.truevisionnews.com/news/371862/two-fishermen-die-after-boat-capsizes-in-ernakulam)