---
title: "ചോറ്റാനിക്കര പ്ലസ് വൺ വിദ്യാർഥിനിയെ വെള്ളക്കെട്ടിൽ മരിച്ച നിലയിൽ കണ്ടെത്തിയ സംഭവം; ജീവനൊടുക്കിയത് കൊറിയൻ യുവാവിന്റെ മരണത്തെ തുടർന്നെന്ന് ആത്മഹത്യ കുറിപ്പ്"
english_title: "Chottanikkara Plus One student found dead in a pond; Suicide note says she committed suicide following the death of a Korean youth."
publisher: "piravomnews.in"
canonical_url: "https://piravom.truevisionnews.com/news/338586/chottanikkara-plus-one-student-found-dead-in-a-pond-suicide-note-says-she-committed-suicide-following-the-death-of-a-korean-youth"
published_at: "2026-01-27T19:17:00+05:30"
category: "Ernakulam "
language: "ml"
image: "https://cf.zdn.im/img/truevisionnews.com/0/image-uploads/6978c1ef0129c_1000477423.png"
keywords: []
---

# ചോറ്റാനിക്കര പ്ലസ് വൺ വിദ്യാർഥിനിയെ വെള്ളക്കെട്ടിൽ മരിച്ച നിലയിൽ കണ്ടെത്തിയ സംഭവം; ജീവനൊടുക്കിയത് കൊറിയൻ യുവാവിന്റെ മരണത്തെ തുടർന്നെന്ന് ആത്മഹത്യ കുറിപ്പ്

> **Lead Summary:** എറണാകുളം : ക്വാറിയിലെ വെള്ളക്കെട്ടിൽ പ്ലസ് വൺ വിദ്യാർഥിനിയെ മരിച്ച നിലയിൽ കണ്ടെത്തിയ സംഭവത്തിൽ ആത്മഹത്യ കുറിപ്പ് കണ്ടെത്തി. ഇൻസ്റ്റഗ്രാം സുഹൃത്തായ കൊറിയൻ യുവാവിൻ്റെ മരണത്തിൽ മനംനൊന്താണ് ആത്മഹത്യയെന്ന് കുറിപ്പിൽ പറയുന്നു.

## Article Content

എറണാകുളം : ക്വാറിയിലെ വെള്ളക്കെട്ടിൽ പ്ലസ് വൺ വിദ്യാർഥിനിയെ മരിച്ച നിലയിൽ കണ്ടെത്തിയ സംഭവത്തിൽ ആത്മഹത്യ കുറിപ്പ് കണ്ടെത്തി. ഇൻസ്റ്റഗ്രാം സുഹൃത്തായ കൊറിയൻ യുവാവിൻ്റെ മരണത്തിൽ മനംനൊന്താണ് ആത്മഹത്യയെന്ന് കുറിപ്പിൽ പറയുന്നു.

തിരുവാങ്കുളം മാമലയിൽ കക്കാട് കിണറ്റിങ്കൽ വീട്ടിൽ മഹേഷിൻ്റെ മകൾ ആദിത്യയാണ് മരിച്ചത്. ചൊവ്വാഴ്‌ച രാവിലെയാണ് പെൺകുട്ടിയെ വീടിനുപരിസരത്തെ ക്വാറിയോട് ചേർന്നുള്ള വെള്ളക്കെട്ടിൽ മരിച്ചനിലയിൽ കണ്ടെത്തിയത്. ആദിത്യയുടെ ബാഗ് പരിശോധിച്ചപ്പോഴാണ് അതിൽനിന്നും ആത്മഹത്യാക്കുറിപ്പ് ലഭിച്ചത്. സ്കൂളിലേക്ക് പോകാൻ വീട്ടിൽനിന്നും ഇറങ്ങിയ ആദിത്യയെ പിന്നീട് ക്വാറിയിലെ വെള്ളക്കെട്ടിൽ മരിച്ച നിലയിൽ കണ്ടെത്തുകയായിരുന്നു.

ഇൻസ്റ്റഗ്രാം വഴിയാണ് ആദിത്യ കൊറിയൻ യുവാവുമായി പരിചയത്തിലായത്‌. 'ഇക്കഴിഞ്ഞ 19-നാണ് യുവാവ് മരിച്ചു, ഇയാളുടെ മരണത്തിൽ മനംനൊന്താണ് ആത്മഹത്യ ചെയ്യുന്നു' എന്നാണ് കുട്ടി കുറിപ്പിൽ പറഞ്ഞിരിക്കുന്നത്. ചോറ്റാനിക്കര പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.

യുവാവ് ശരിക്കും മരിച്ചിട്ടുണ്ടോ എന്നും, എന്താണ് പെൺകുട്ടിയെ മരണത്തിലേക്ക് നയിച്ചത് എന്നും പോലീസ് അന്വേഷിക്കും. പെൺകുട്ടിയുടെ മരണത്തിന് പിന്നിൽ മറ്റെന്തെങ്കിലും കാരണങ്ങൾ ഉണ്ടോ എന്നും അന്വേഷിക്കുന്നുണ്ട്. ആദിത്യയുടെ ഫോൺ അടക്കമുള്ള വസ്‌തുക്കൾ പരിശോധിക്കാനുള്ള തീരുമാനത്തിലാണ് പോലീസ്.

### Related Links & Sources
- [Original Story Source](https://piravom.truevisionnews.com/news/338586/chottanikkara-plus-one-student-found-dead-in-a-pond-suicide-note-says-she-committed-suicide-following-the-death-of-a-korean-youth)