കൊച്ചി : (piravomnews.in)നഗരയാത്രാദുരിതത്തിന്‌ പരിഹാരമാകുന്ന കൊച്ചിയിലെ മൂന്നാമത്തെ റോ- റോ ജങ്കാറിന്റെ നിർമാണം ഉടൻ ആരംഭിക്കും.
കോർപറേഷനുവേണ്ടി കൊച്ചി കപ്പൽശാല നിർമിക്കുന്ന റോ റോയുടെ കരാർ കോർപറേഷൻ അഡീഷണൽ സെക്രട്ടറി പി എസ് ഷിബു, കപ്പൽശാല ഡയറക്ടർ ഓഫ് ഓപ്പറേഷൻസ് ശ്രീജിത് കെ നാരായണൻ എന്നിവർ ചേർന്ന്‌ ഒപ്പുവച്ചു.
കൊച്ചി സ്മാർട്ട് മിഷൻ ലിമിറ്റഡ്‌ സാമ്പത്തിക സഹായം നൽകും. 14.9 കോടി രൂപ ചെലവഴിച്ചാണ്‌ നിർമാണം. 18 മാസമാണ് നിർമാണ കാലാവധിയെങ്കിലും ആറുമാസംമുമ്പ്‌ പ്രവർത്തനം പൂർത്തീകരിക്കണമെന്ന മേയർ എം അനിൽകുമാറിന്റെ അഭ്യർഥന കപ്പൽശാലാ ചെയർമാൻ മധു എസ് നായർ അംഗീകരിച്ചു.
വിനോദസഞ്ചാര മേഖലയിലുള്ളവരുടെ അഭിപ്രായം മാനിച്ച്‌ റോ -റോയുടെ ശബ്ദം ഒഴിവാക്കാനുള്ള നടപടികൾകൂടി ഡിസൈൻ വിഭാഗം പരിഗണിക്കും. മൂന്നാമത്തെ റോ -റോ വരുന്നതോടെ, ഏതെങ്കിലും ഘട്ടത്തിൽ സാങ്കേതിക തകരാറുണ്ടായാൽ രണ്ട് റോ- റോയ്ക്ക് മുടക്കമില്ലാതെ സർവീസ് നടത്താൻ കഴിയും.
പശ്ചിമകൊച്ചിയുടെ യാത്രാ ആവശ്യത്തിനുള്ള മൂന്നാമത്‌ റോ റോ നിർമാണം ബജറ്റിലുൾപ്പെടെ കോർപറേഷൻ പ്രഖ്യാപിച്ചിരുന്നതാണ്‌. ചടങ്ങിൽ കപ്പൽശാലാ സാങ്കേതികവിഭാഗം ഡയറക്ടർ ബിജോയ് ഭാസ്കർ, കോർപറേഷൻ എക്സിക്യൂട്ടീവ്‌ എൻജിനിയർ ടി എ അമ്പിളി തുടങ്ങിയവർ പങ്കെടുത്തു.
The #construction of the third #Ro-Ro Jankar in #Kochi will start soon
