കൊച്ചി : (piravomnews.in) ഇടപ്പള്ളി പ്രാഥമികാരോഗ്യകേന്ദ്രത്തിലെ ഡോക്ടറെ ആക്രമിക്കാൻ ശ്രമിച്ച പ്രതിയെ അറസ്റ്റ് ചെയ്യാത്തതിൽ ആശുപത്രി അങ്കണത്തിൽ കെജിഎംഒഎ പ്രതിഷേധിച്ചു.
ഡെപ്യൂട്ടി ഡിഎംഒ ഡോ. കെ സവിത, കെജിഎംഒഎ ജില്ലാ പ്രസിഡന്റ്‌ ഡോ. കെ എ മുഹമ്മദ്‌ സലിം, ഡോ. എൻ എസ്‌ കിഷോർ, ഡോ. ആർ നിഖിലേഷ്‌ മേനോൻ തുടങ്ങിയവർ സംസാരിച്ചു.
തിങ്കളാഴ്‌ച ഇടപ്പള്ളി പ്രാഥമികാരോഗ്യ കേന്ദ്രത്തിൽ താടിക്ക്‌ പൊട്ടലുമായെത്തിയ രോഗിയെ ചികിത്സിക്കുകയായിരുന്ന ഡോ. നിഖിലേഷ്‌ മേനോന്‌ നേരെയാണ്‌ ഭീഷണിയും ആക്രമണശ്രമവും ഉണ്ടായത്‌.
വരി തെറ്റിച്ചാണ്‌ രോഗിയെ ചികിത്സിക്കുന്നതെന്നാരോപിച്ച്‌ ഷാജു എന്നയാൾ ഡോ. നിഖിലേഷിനുനേരെ കയർത്തു സംസാരിച്ചു. അത്യാഹിത സാഹചര്യത്തിൽ താടിക്ക്‌ സ്‌റ്റിച്ച്‌ ഇട്ടതിനുശേഷം നോക്കാമെന്ന്‌ ഡോക്‌ടർ പറഞ്ഞെങ്കിലും തൃപ്‌തനായില്ല.
ജൂനിയർ ഡോക്‌ടർമാരെയും അയാൾ ഭീഷണിപ്പെടുത്തി. ചികിത്സ തേടിയശേഷം വീട്ടിലേക്ക്‌ മടങ്ങിയ ഷാജു പിറ്റേദിവസവും ആശുപത്രിയിലെത്തി പരോളിലിറങ്ങിയ പ്രതിയാണെന്നും ഡോക്ടറെ കാണിച്ചുതരാമെന്നും പറഞ്ഞു. എളമക്കര പൊലീസിൽ പരാതി നൽകിയെങ്കിലും നടപടി സ്വീകരിച്ചില്ലെന്ന്‌ ഡോ. നിഖിലേഷ്‌ പറഞ്ഞു.
#KGMOA #protested that the #accused who #tried to #assault the #doctor was not #arrested
