കൊച്ചി : (piravomnews.in) വീഴ്ചയിൽ ഇടുപ്പെല്ലിന് സാരമായി പരിക്കേറ്റ നൂറ്റിനാലുകാരിക്ക്‌ വിജയകരമായി ശസ്‌ത്രക്രിയ ചെയ്ത് എറണാകുളം ജനറൽ ആശുപത്രിയിലെ ഡോക്‌ടർമാർ. എറണാകുളം സ്വദേശിയായ തുളസിക്കാണ്‌ ശസ്‌ത്രക്രിയ നടത്തിയത്‌.
ഇത്തരം ഘട്ടങ്ങളിൽ സാധാരണയായി രോഗിയോ ബന്ധുക്കളോ ശസ്‌ത്രക്രിയക്ക്‌ സമ്മതം നൽകാറില്ല. എന്നാൽ, തുളസിയുടെ ബന്ധുക്കൾ ശസ്‌ത്രക്രിയക്ക്‌ സന്നദ്ധരായി.
പ്രായം പ്രധാന ഘടകമാണെങ്കിലും രോഗിയുടെ ആരോഗ്യസ്ഥിതി പരിശോധിച്ച് മെഡിസിൻ, ഓർത്തോ, കാർഡിയോളജി, അനസ്‌തേഷ്യ വിഭാഗങ്ങളിലെ ഡോക്ടർമാരും തയ്യാറായതിന്റെ അടിസ്ഥാനത്തിൽ സൂപ്രണ്ട് ഡോ. ഷഹിർ ഷാ സർജറിക്ക് അനുമതി നൽകുകയായിരുന്നു.
ഓർത്തോ വിഭാഗത്തിലെ ഡോ. കെ രാജേഷ്, ഡോ. മനു പി വിശ്വം, അനസ്തേഷ്യയിലെ ഡോ. ഷർളി എന്നിവരുടെ നേതൃത്വത്തിൽ നഴ്സുമാരും ടെക്നീഷ്യന്മാരും അടങ്ങിയ സംഘമാണ്‌ ശസ്‌ത്രക്രിയ ചെയ്‌തത്‌.
ചൊവ്വാഴ്ച ആശുപത്രി വിട്ട തുളസി വാക്കറിന്റെ സഹായത്താൽ നടന്നുതുടങ്ങി. ഏതാനം ദിവസങ്ങൾക്കകം സഹായമില്ലാതെ നടക്കാനാകുമെന്ന്‌ ഡോക്‌ടർമാർ പറഞ്ഞു.
#Ernakulam #General #Hospital #gains; A #hundred and four-year-old #woman has a #successful #hip #surgery
.jpg)
