തൃപ്പൂണിത്തുറ : (piravomnews.in) വൈക്കം റോഡിൽ പുതിയകാവുമുതൽ നടക്കാവുവരെ രാവിലെയും വൈകിട്ടുമുണ്ടാകുന്ന ഗതാഗതക്കുരുക്ക് യാത്രക്കാർക്ക് ദുരിതമാകുന്നു.
രാവിലെ ജോലിക്ക് പോകുന്നവർ മണിക്കൂറുകളോളം കുരുക്കിൽ കിടക്കേണ്ടിവരുന്നുണ്ട്. പുതിയകാവ് ജങ്ഷൻ, ഉദയംപേരൂർ കവല, നടക്കാവ് ജങ്ഷൻ തുടങ്ങിയ സ്ഥലങ്ങളിലെ ഗതാഗതക്കുരുക്ക് റോഡിൽ ഉടനീളം വ്യാപിക്കുകയാണ് പതിവ്.
പുതിയകാവിൽ മാർക്കറ്റ് റോഡിൽനിന്നും കുരീക്കാട് ഭാഗത്തുനിന്നും ഉദയംപേരൂർ കവലയിൽ കണ്ടനാട് ഭാഗത്തുനിന്നും നടക്കാവ് ജങ്ഷനിൽ മുളന്തുരുത്തി ഭാഗത്തുനിന്നും വരുന്ന വാഹനങ്ങൾ വൈക്കം റോഡിൽ പ്രവേശിക്കുമ്പോഴാണ് ഗതാഗതക്കുരുക്ക് രൂക്ഷമാകുന്നത്.
റോഡിൽ ആവശ്യത്തിന് വീതിയില്ലാത്തതും ബസ് ബേ ഇല്ലാത്തതും ഗതാഗതക്കുരുക്കിന് കാരണമാകുന്നുണ്ട്. തിങ്കൾ രാവിലെ എട്ടിന് ആരംഭിച്ച ഗതാഗതക്കുരുക്ക് പകൽ 11 വരെ നീണ്ടതോടെ നിരവധി വാഹനങ്ങൾ റോഡിൽ കുടുങ്ങി.
എസ്എൻ ജങ്ഷൻമുതൽ പൂത്തോട്ടവരെയുള്ള റോഡ് നാലുവരിപ്പാതയാക്കുന്ന നടപടികൾ എത്രയുംവേഗം പൂർത്തിയാക്കി ഗതാഗതക്കുരുക്ക് പരിഹരിക്കണമെന്നാണ് നാട്ടുകാരുടെയും യാത്രക്കാരുടെയും ആവശ്യം.
#Traffic #jams are a #nuisance for #commuters