വടക്കേക്കര : (piravomnews.in) മൂത്തകുന്നം–--മാല്യങ്കര റോഡിലെ തറയിൽകവല പപ്പടവളവിനുസമീപം ഐസ് കയറ്റിവന്ന പിക്കപ് വാൻ മറിഞ്ഞു.
വെള്ളി രാവിലെ 7.30നാണ് അപകടം. വളവുതിരിച്ചപ്പോൾ മറിയുകയായിരുന്നു. മറിഞ്ഞ വാഹനത്തിൽ മൂന്നുപേരുണ്ടായിരുന്നു. ഡ്രൈവറുടെ കൈക്ക് ചെറിയ പരിക്കുണ്ട്. മറ്റു രണ്ടുപേരും പരിക്കേൽക്കാതെ രക്ഷപ്പെട്ടു.
വീതികുറഞ്ഞ മൂത്തകുന്നം–-മാല്യങ്കര റൂട്ടിലൂടെ മീനും മറ്റും കയറ്റിവരുന്ന വാഹനങ്ങൾ അമിതവേഗത്തിൽ ചീറിപ്പായുന്നത് പതിവാണ്. മുനമ്പം ഹാർബറിൽനിന്നുള്ള മീനുമായി വിവിധ ചന്തകളിലേക്കുള്ള വാഹനങ്ങൾ പുലർച്ചെമുതൽ ഇതിലൂടെ കടന്നുപോകുന്നുണ്ട്.
ഒട്ടേറെ വളവും തിരിവുമുള്ള ഈ വഴിയിലൂടെ എൽഎൻജി ടെർമിനലിലേക്കുള്ള വലിയ കണ്ടെയ്നർ ലോറികളും പോകുന്നുണ്ട്. വാഹനങ്ങളിലെ ഐസും മീനിന്റെ ചോരയും മറ്റും കലർന്ന മലിനജലം റോഡിൽ വീഴുന്നത് സ്കൂട്ടർ യാത്രികരെ അപകടത്തിൽപ്പെടുത്തുന്നു.
പിക്കപ് വാൻ മറിയുന്നതിന് അരമണിക്കൂർ മുമ്പ് പപ്പടവളവിനു സമീപത്തുതന്നെ ഒരു സ്കൂട്ടർ യാത്രികൻ തെന്നിവീണു. ഇത്തരം അപകടങ്ങളിൽ ഒട്ടേറെ ഇരുചക്രവാഹന യാത്രികർക്കു പരിക്കേറ്റിട്ടുണ്ട്.
വടക്കൻ ജില്ലകളിൽനിന്ന് എറണാകുളത്തേക്ക് പോകാനുള്ളവർ അധികമായും ആശ്രയിക്കുന്ന റോഡാണിത്. ഇതിനാൽ ഇവിടെ ഗതാഗതത്തിരക്ക് രൂക്ഷമാണ്. ഒട്ടേറെ സ്വകാര്യബസുകളും ഇതിലൂടെ സർവീസ് നടത്തുന്നുണ്ട്.
The #pickupvan #carrying #ice #overturned