പിറവം : (piravomnews.in) ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായുടെ പ്രിൻസിപ്പൽ സെക്രട്ടറിയും സഭാ വക്താവുമായ ഫാ. ഡോ. ജോൺസ് ഏബ്രഹാം കോനാട്ടിന് കാതോലിക്കാബാവാ "മലങ്കര മൽപ്പാൻ' സ്ഥാനം നൽകി.
മലങ്കരസഭയുടെ ചരിത്രത്തിൽത്തന്നെ ആദ്യമായി "റീശ് കോർഎപ്പിസ്കോപ്പാ' എന്ന സ്ഥാനം നൽകി വാഴിച്ചതിനോടനുബന്ധിച്ചാണ് മലങ്കര മൽപ്പാൻ സ്ഥാനവും നൽകിയത്. പാമ്പാക്കുടയിലെ പുരാതനമായ കോനാട്ട് കുടുംബാംഗമാണ്‌ ഫാ. ജോൺസ് ഏബ്രഹാം കോനാട്ട്.
മലങ്കര സഭയുടെ ആരാധനകളും പ്രാർഥനകളും മലയാളത്തിലേക്ക് വിവർത്തനം ചെയ്യാൻ നേതൃത്വം നൽകിയിട്ടുണ്ട്‌. സുറിയാനി ഭാഷാ പണ്ഡിതനാണ്‌.
സുറിയാനി പിതാക്കന്മാരെക്കുറിച്ചും ആരാധനാ ആചാരാനുഷ്ഠാനങ്ങളെക്കുറിച്ചും ഗവേഷണം നടത്തുകയും നിരവധി ഗ്രന്ഥങ്ങളും ലേഖനങ്ങളും രചിക്കുകയും ചെയ്തിട്ടുണ്ട്.
പാമ്പാക്കുട സെന്റ് ജോൺസ് എഫേസോസ് ഓർത്തഡോക്സ് സിറിയൻ വലിയ പള്ളിയിൽ നടന്ന സ്ഥാനാരോഹണ ശുശ്രൂഷകൾക്ക് ബസേലിയോസ് മാർത്തോമ്മ മാത്യൂസ് ത്രിതീയൻ കാതോലിക്കബാവ നേതൃത്വം നൽകി.
കാതോലിക്കാ ബാവയുടെ കൽപ്പന സുന്നഹദോസ് സെക്രട്ടറി യൂഹാനോൻ മാർ ക്രിസോസ്റ്റ്മോസ് മെത്രാപോലീത്ത വായിച്ചു. ബുധനാഴ്‌ച വൈകിട്ട്‌ അഞ്ചിന്‌ ഇടവകയുടെ സ്വീകരണം നൽകും.
Fr. Jones #Abraham #Connaught is now '#Malankara Malpan'
