മരട് : (piravomnews.in) ജീവകാരുണ്യ പ്രവർത്തകനെ ബൈക്കിലെത്തിയ സംഘം ആക്രമിച്ച്‌ പരിക്കേൽപ്പിച്ചു.
ജനകീയ രക്തദാനസേന ജില്ലാ ചീഫ് കോ–- ഓർഡിനേറ്ററും ടാക്സി ഡ്രൈവറുമായ തേവരയിൽ താമസിക്കുന്ന മലപ്പുറം പിലാശേരി വീട്ടിൽ ഷാഹുൽ ഹമീദിനെ(29)യാണ് ആക്രമിച്ചത്. ഞായറാഴ്ച അർധരാത്രിയായിരുന്നു സംഭവം.
വൈറ്റില തൈക്കൂടം പുതിയറോഡിനുസമീപം ഇദ്ദേഹം സഞ്ചരിച്ച കാറിനൊപ്പം ബൈക്കിൽ എത്തിയവരാണ്‌ ആക്രമിച്ചത്. രണ്ടുമൂന്നു തവണ അപകടകരമായ രീതിയിൽ ബൈക്ക് ഓടിച്ചെത്തി. തൈക്കൂടം ബണ്ട് റോഡിലേക്ക് പ്രവേശിച്ചപ്പോൾ കാറിന്റെ പുറകിൽ ഹെൽമെറ്റ് കൊണ്ട് അടിച്ചു.
കാർ നിർത്തി ഇറങ്ങിയപ്പോൾ കണ്ണിലേക്ക്‌ കുരുമുളക് സ്പ്രേ അടിച്ചശേഷം ഹെൽമെറ്റ് ഉപയോഗിച്ച്‌ ആക്രമിക്കുകയായിരുന്നുവെന്ന് ഷാഹുൽ ഹമീദ് പറഞ്ഞു.
കാറിന്റെ ഗ്ലാസും അടിച്ചുതകർത്തു. തലയ്ക്കും ചുമലിനും മുറിവേറ്റ ഷാഹുൽ ഹമീദ് എറണാകുളം ജനറൽ ആശുപത്രിയിൽ ചികിത്സ തേടി. മരട് പൊലീസ് കേസെടുത്തു. സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ആരംഭിച്ചു.
A #group on a bike #attacked the #charity #worker and #injured him
