കളമശേരി : (piravomnews.in) ലോക്‌സഭാ മണ്ഡലത്തിലെ ഏഴ് നിയോജക മണ്ഡലത്തിലെയും വോട്ടെടുപ്പിനുശേഷം ബാലറ്റ് പെട്ടികളും അനുബന്ധ ഉപകരണങ്ങളും കുസാറ്റിലെ നാല് കേന്ദ്രങ്ങളിൽ തയ്യാറാക്കിയ 11 സ്ട്രോങ് റൂമുകളിൽ സൂക്ഷിക്കും.
സർവകലാശാലയിലെ വിവിധ വകുപ്പുകളിലും ക്യാമ്പസിന് സമീപമുള്ള തൃക്കാക്കര സെന്റ്‌ ജോസഫ്സ് സ്കൂളിലുമായാണ് സ്ട്രോങ് റൂമുകൾ ഒരുക്കിയത്. കെട്ടിടങ്ങളുടെ വാതിലിലും ചുറ്റുഭാഗത്തുമുള്ള ജനലിലും പ്രത്യേകം മരപ്പലകവച്ച് ആണിയടിച്ച് സുരക്ഷിതമാക്കി.
സെന്റ്‌ ജോസഫ്സ് സ്കൂളിലെ മൂന്ന് ക്ലാസ് മുറികളിലാണ് ബാലറ്റ് സൂക്ഷിക്കുക. കുസാറ്റിൽ സ്കൂൾ ഓഫ് എൻജിനിയറിങ്ങിലെ സോഫ്റ്റ് വെയർ ബ്ലോക്ക്, ലാബ് ബ്ലോക്ക് കെട്ടിടങ്ങളും കുസാറ്റ് സെമിനാർ കോംപ്ലക്സും തെരഞ്ഞെടുപ്പ് ഉദ്യോഗസ്ഥർ ഏറ്റെടുത്തു.
കെട്ടിടത്തിന് ചുറ്റും പ്രത്യേകം ലൈറ്റുകളും നിരീക്ഷണ ക്യാമറയും ഒരുക്കിയിട്ടുണ്ട്. വോട്ടെണ്ണുന്ന ജൂൺ നാലുവരെ ശക്തമായ പൊലീസ് കാവലിലായിരിക്കും കെട്ടിടവും ചുറ്റുപാടും.
ബാലറ്റ് പെട്ടികൾ സൂക്ഷിച്ച കേന്ദ്രങ്ങളിൽ തന്നെ വോട്ടെണ്ണലും നടക്കുമെന്ന് കളമശേരി പൊലീസ് ഇൻസ്പെക്ടർ പ്രദീപ് കുമാർ പറഞ്ഞു.
#Ernakulam #Lok #Sabha Constituency #Ballot #Boxes in #Cusat
