മൂവാറ്റുപുഴ : (piravomnews.in) മൂവാറ്റുപുഴയിൽ എൽഡിവൈഎഫിന്റെ ഡിജെ റോഡ് ഷോയ്ക്കിടെ യുഡിഎഫ് യുവജന സംഘടനാ പ്രവർത്തകർ സംഘർഷമുണ്ടാക്കി.
എൽഡിവൈഎഫ് പ്രവർത്തകർക്ക് മർദനമേറ്റു. ഡിവൈഎഫ്ഐ ബ്ലോക്ക് കമ്മിറ്റി അംഗം ഇ ബി രാഹുല് പരിക്കേറ്റ് ആശുപത്രിയിൽ ചികിത്സയിലാണ്. രാഹുലിന്റെ മുഖത്ത് മർദനമേറ്റ് പരിക്കുണ്ട്. സംഭവത്തിൽ മൂവാറ്റുപുഴ പൊലീസ് കേസെടുത്തു.
ചൊവ്വ രാത്രി 8.30 ഓടെയാണ് സംഭവം. എൽഡിവൈഎഫ് സംഘടിപ്പിച്ച യൂത്ത് വിത്ത് ജോയ്സ് ഡിജെ റോഡ് ഷോയുടെ സമാപനയോഗം ചേരുന്ന ചാലിക്കടവ് കവലയിൽ എത്തിയപ്പോഴാണ് യൂത്ത് കോൺഗ്രസ് മണ്ഡലം നേതാക്കൾ ഉൾപ്പെടെ ആക്രമണം നടത്തിയത്.
മൂവാറ്റുപുഴ നഗരസഭാ കൗൺസിലർ അജി മുണ്ടാടൻ ഉൾപ്പെടെ യുഡിഎഫ് പ്രവർത്തകർ കൊടി വീശി പാഞ്ഞടുത്തു. വാദ്യമേളങ്ങളും പാട്ടും ഡാൻസുമായി നീങ്ങിയ എൽഡിവൈഎഫ് പ്രവർത്തകർക്കിടയിൽ കയറി സംഘർഷമുണ്ടാക്കി.
ഇത് എതിർത്തവരെയാണ് ആക്രമിച്ചത്. മഹിളാ സംഘം സംസ്ഥാന സെക്രട്ടറി ഇ എസ് ബിജിമോൾ സമ്മേളനം ഉദ്ഘാടനം ചെയ്യുന്നതിനിടെയായിരുന്നു സംഘർഷം. തുടർന്ന് ബിജിമോൾ പ്രസംഗം പൂർത്തിയാക്കിയില്ല.
മുൻകൂർ അനുമതിയോടെ നടത്തിയ എൽഡിവൈഎഫ് പരിപാടി അലങ്കോലപ്പെടുത്തുകയായിരുന്നു യൂത്ത് കോൺഗ്രസിന്റെ ലക്ഷ്യമെന്നും കുറ്റക്കാർക്കെതിരെ നടപടി സ്വീകരിക്കണമെന്ന് എൽഡിവൈഎഫ് മണ്ഡലം കമ്മിറ്റി ആവശ്യപ്പെട്ടു.
#UDF #attack during #DJ #road show of #LDYF in #Muvattupuzha