കൊച്ചി : (piravomnews.in) എൽഡിഎഫ്‌ സ്ഥാനാർഥി കെ ജെ ഷൈൻ ടീച്ചറിന്റെ തെരഞ്ഞെടുപ്പ്‌ പ്രചാരണപരിപാടിയുടെ കൊട്ടിക്കലാശം എറണാകുളം മണ്ഡലം മുഴുവൻ പിന്നിട്ടുള്ള മെഗാ റോഡ്‌ ഷോയോടെ.
ബുധൻ രാവിലെ എട്ടിന്‌ പൂത്തോട്ടയിൽനിന്ന്‌ തുറന്നവാഹനത്തിൽ ആരംഭിക്കുന്ന റോഡ്‌ ഷോയ്‌ക്ക്‌ വൈകിട്ട്‌ നാലോടെ പാലാരിവട്ടം ജങ്ഷനിൽ ആവേശക്കലാശമാകും.
പ്രധാന പാതകളിലൂടെ കടന്നുപോകുന്ന റോഡ്‌ ഷോയുടെ പ്രചാരണ വാഹനങ്ങളും നൂറോളം ഇരുചക്രവാഹനങ്ങളിൽ എൽഡിഎഫ്‌ പ്രവർത്തകരും അകമ്പടിയാകും.
വൈക്കം റോഡിലൂടെ തൃപ്പൂണിത്തുറയിലെത്തുന്ന റോഡ്‌ ഷോ വടക്കേക്കോട്ടയിലൂടെ പേട്ടയിൽനിന്ന്‌ മരടിലേക്ക്‌ തിരിഞ്ഞ്‌ പള്ളുരുത്തിയിലെത്തും.
ജയലക്ഷ്‌മി തിയറ്ററിന്റെ പടിഞ്ഞാറ്‌ വഴി കഴുത്തുമുട്ട്‌, പരിപ്പ്‌ ജങ്ഷൻ, കപ്പലണ്ടി മുക്ക്‌, പനയപ്പിള്ളിവഴി തോപ്പുംപടിയിലെത്തി ബിഒടി പാലത്തിലൂടെ വാത്തുരുത്തി പിന്നിട്ട്‌ തേവരയിലും എംജി റോഡിലൂടെ പള്ളിമുക്കിലുമെത്തും.
മാധവഫാർമസി ജങ്ഷനിൽനിന്ന്‌ ബാനർജി റോഡിലൂടെ ഗോശ്രീ പാലംവഴി വല്ലാർപാടം, ഞാറയ്‌ക്കൽ എന്നിവിടങ്ങൾ പിന്നിട്ട്‌ ചെറായിയിൽ ഉച്ചഭക്ഷണം. പകൽ 1.30ന്‌ പറവൂരിലേക്ക്‌. ചെറിയപ്പിള്ളിയിൽനിന്ന്‌ കൂനമ്മാവ്‌, പാനായിക്കുളംവഴി കടുങ്ങല്ലൂരിൽ.
മുപ്പത്തടം, പാതാളം, കളമശേരി, ഇടപ്പള്ളി ടോൾവഴി തൃക്കാക്കരയിൽ. അവിടെനിന്ന്‌ കാക്കനാട്‌, വാഴക്കാല, ആലിൻചുവടുവഴി നാലിന്‌ പാലാരിവട്ടത്ത്‌. തുടർന്ന്‌ എൽഡിഎഫ്‌ പ്രവർത്തകരുടെ ആവേശം കൊടുമുടിയേറ്റി പ്രചാരണത്തിന്‌ സമാപനം.
യുഡിഎഫ്‌ സ്ഥാനാർഥി ഹൈബി ഈഡന്റെ റോഡ്‌ ഷോ വൈകിട്ട്‌ നാലിന്‌ കലൂർ മണപ്പാട്ടിപ്പറമ്പിൽനിന്ന്‌ ആരംഭിച്ച്‌ ടൗൺഹാളിനുമുന്നിൽ സമാപിക്കും.
എൻഡിഎ സ്ഥാനാർഥി ഡോ. കെ എസ് രാധാകൃഷ്‌ണന്റെ റോഡ്‌ ഷോ വൈകിട്ട്‌ നാലിന്‌ എംജി റോഡിലെ തെരഞ്ഞെടുപ്പ്‌ കമ്മിറ്റി ഓഫീസിൽനിന്ന്‌ ആരംഭിച്ച്‌ മാധവ ഫാർമസി ജങ്ഷനിൽ സമാപിക്കും.
#ShineTeacher's #mega #roadshow #today
.jpg)
