പിറവം : (piravomnews.in) മണ്ണുമായി ടിപ്പറുകൾ ഇടതടവില്ലാതെ കടന്നുപോകുന്ന പിറവം–-മൂവാറ്റുപുഴ റോഡിൽ അപകടങ്ങൾ തുടർക്കഥയാകുന്നു.
ചൊവ്വ പകൽ പിറമാടം ശൂലം ഇറക്കത്തിൽ കുത്തനെയുള്ള വളവിൽ നിയന്ത്രണംവിട്ട ടിപ്പർ മറിഞ്ഞതാണ് അവസാന സംഭവം. ആർക്കും പരിക്കില്ല.തിങ്കളാഴ്ച പാമ്പാക്കുട എംടിഎം കവലയ്‌ക്കുസമീപം നിയന്ത്രണംവിട്ട ടിപ്പർ മതിലിൽ ഇടിച്ചുകയറിയിരുന്നു.
കുട്ടികളും സ്ത്രീകളും ഉൾപ്പെടെ നിരവധിപേർക്കാണ് അടുത്തകാലത്ത് വിവിധ അപകടങ്ങളിലായി പരിക്കേറ്റത്. കഴിഞ്ഞമാസം ഓണക്കൂർ നിരപ്പിൽ സ്കൂട്ടറിനുപിറകിൽ ടിപ്പറിടിച്ച് രണ്ടുപേർക്ക് പരിക്കേറ്റിരുന്നു. ഇടിച്ചശേഷം നിർത്താതെ പോയ ടിപ്പർ നാട്ടുകാർ പിന്തുടർന്നാണ് പിടികൂടിയത്.
പാമ്പാക്കുട ടൗണിൽ സ്ത്രീകൾ സഞ്ചരിച്ച സ്‌കൂട്ടറിലും ടിപ്പർ ഇടിച്ചിരുന്നു. ശ്രീനാരായണപുരം ക്ഷേത്രത്തിനുസമീപം ഓട്ടോറിക്ഷയെ ടിപ്പർ ഇടിച്ചുതെറിപ്പിച്ചു.
ഒന്നിലധികം ലോറികൾ ഒരേസമയം നിരത്ത് നിറഞ്ഞുപോകുന്നതിനാൽ ഇരുചക്രവാഹനയാത്രക്കാരും കാൽനടയാത്രക്കാരും വലിയ ബുദ്ധിമുട്ടിലാണ്‌.
#Tipper #accident on #Muvatupuzha-Piravam #road #sequel
